Rom 1 | MHL | STEP | Aria yo Pol-ke parosifa fain ni Rom nia siisimomiyem. Yo Yeesus Krais uuwow mua-ke. Mua Maneka-ke efa pepekimeya yo aposel arep Yeesus opor eliwa wia maakem-miawiyem, mua nain-ke.

Romans 1

1 Aria yo Pol-ke parosifa fain ni Rom nia siisimomiyem. Yo Yeesus Krais uuwow mua-ke. Mua Maneka-ke efa pepekimeya yo aposel arep Yeesus opor eliwa wia maakem-miawiyem, mua nain-ke. 2 Opor eliwa mua ikoka ekapowa maek nain Mua Maneka ona iiriwiw maep-pueya wi profet-ke wia maakemi maifa-pa siisimep-puiwkin ikua, opora nain. 3 Opor eliwa nain ona Muuka maek. Nain yiena Maneka Yeesus Krais naneka. Eena saria maneka Dewit kerekera-pa imenareya Dewit nembesir teeria-ke naemik. O umep ikaeya Mua Maneka-ke iikirowak. Iikiroweya Ewar Eliwa-ke ariman wuak. O Mua Maneka muukiya kekanowa onaiya ikua. 5 Ne Mua Maneka o unuma-pa aposel uuwowa yia wuap yia asipam-ikaiya. Naeya miiw unowa ne owow unowa wi kema kirep Yeesus Krais opora wiar opap ookuk naep ikiwemi wia maakem-miawimik. 6 Ni Rom pun naap ne Mua Maneka ona nia naeya ni aakisa Yeesus teeria wiar ikeman. Naeya yo parosifa fain nia sesekomami feenap nia maiyem, ni Mua Maneka ona eena nia kookalep nia aaweya ona teeria kakeniw wiar ikeman nain. Auwa Mua Maneka, ne yiena Maneka Yeesus Krais wi ikos nia kemalep kema sonom eliwa niuk.

Pol Rom wiar ikiwowa kema manekiw ikua

8 Aria yo kiikir feenap mainen, ni kekanep Yeesus Krais opora kekanowa wiar opap ookam-ikaiman nain miiw unowa iiriw meta arimok. Muut nain Yeesus Krais unuma-pa Mua Maneka sira eliwa naakiyem. 9 Yo aakisa opora fain makena-ke, Mua Maneka opor makena-ke efar nainok. O eena yo anane fariyem nain, ne yena kemaniya uuwomami o Muuka opor eliwa piomiyem nain. Makena feenap, yo anane Mua Maneka faremi ni nia naiyem. Ne pun nokariyem, o era-ko imenomeya ikip ni nia urufinen.

11 Mua Maneka sira-sira kamenap yia asipiya nain-ko yena miir onaiya ikip nia maakemkun ni kekanowa aaweka naep yo nia urufowa kema manekiw ikaiyem. 12 Yo feenap maep ikiwowa maiyem, yiena unowiya Krais opora opami Krais sira ookimik, nain aakunemi kema yiam iikirowam-ikaiyen. Naap onami yiam ane-kekanowami i unowiya kekanep opora naap opap ikaiyen.

13 Emar unowik, ni fain pun amisareka naep, yo niar ikiwowa fofa wuowa unowa arem. Nain maa-ke efa imenareya me niar ikiwem. Yo wi owow papako iiriw wia asipamkun Yeesus opora wiar opamik nain makena wiar urufamik. Naapeya nis pun naap nia asipekam naep niar ikiwinen akena naiyem. 14 Nain yo me uuwowa-ko me ikua. Ikiwep Yeesus opor eliwa wi Grik wia maakemi wi owow oko oko pun wia maakem-miawiyem akena. Wi mua amis maneka onaiya ikemik nain, ne wi amis marewa nain pun unowiya wia maakem-miawiyem. 15 Naapeya ni Rom pun niar ikiwep Yeesus opor eliwa nia maakowa nain manek akena kema urupiyem.

Pol Yeesus opor eliwa wia maakowa kekanep ikua

16 Yo Yeesus opor eliwa wia maakowa nain emina me ururiyem. Moram opora nain Mua Maneka kekanowa onaiya ikua, ne wi opora opimik nain Mua Maneka-ke wia aaweya wi pina piipuap kakeniw ikaikuan. Wi Yuuda kiikir opora opamik, ne aakisa ni owow oko oko pun opora opaman. 17 Ne oko pun feenap, Yeesus opor eliwa wia maakiwkin amisarep maikuan, Mua Maneka i emeria mua kakeniw ikemik, naap yia naowa nain era feenap ikua. I Yeesus opor eliwa wiar opamkun Mua Maneka-ke i mua kaken eliwa yia naiya, era oko-ko me ikua. Iiriw pun naap ikua, moram Mua Maneka ona opor ara oko nain feenap maek,

“Wi mua Mua Maneka opora wiar opimik nain kaken eliwa wia naiya.”
(Habakuk 2.4)

Naap wia naeya wi anane eliwa ikaikuan.

Wi Mua Maneka mikikira iwemik nain bagiaw wia ofakowinon

18 Aria wi mua Mua Maneka mikikira iwemi sira samora onimik nain Mua Maneka owow iinan-pa ikaiya nain-ke ona bagiaw ariman wuam-ikaiya. Wi mua nain sira samora onami opor makena ookowa era iiwkimik. Naeya mua papako ookowa mika-kofimik. 19 Wi mua nain Mua Maneka bagiaw wiar urufikuan, moram ona maa muutitik onomakek nain ona wame ofakowak, nain wis-ke amisa wiar ifemakimik. Makena, i Mua Maneka me urufimik, nain iiriw iiriw maa tawerarek nain wiar urufap maimik, “Aa makena, Mua Maneka anane anane ikaiya, ne kekanowa pun naap wiar ikaiya,” naap maimik. Naapeya wi feenap me mauk, “I Mua Maneka me amisarimik.” Wi sailowa me pepek.

Wi Mua Maneka mikikira iwep wiena inasina kookalimik

21 Wi Mua Maneka amisaremik. Nain unuma me wiar fakerimik. Ne pun o sira eliwa-ko me naakimik, weetak. Wi kema ne woosa iiwawun wiar momorareya kokom tenow maneka ikemik. 22 Wiena wiam purupemi maimik, “I amis mua-ke,” naap naimik. Nain weetak, wi iiwawun woosa wiar momorarek. 23 Naemi wi Mua Maneka anane ikaiya nain lotu me onowa, wi kiiriw mua miira sirarep fain inasina-ke naimik. I mua umimik, i anane me ikaimik, nain wi mua miira sirarep inasina arowamik. Ne nepa, maa eneka ne ifa pun sirarep inasina arowamik. 24 Wi naap momor oniwkin Mua Maneka-ke maek, “Wiena maa, neek onam-ikauk.” Naeya wi wiena kookalowa welawami emin ururowa sira wiam onam-ikemik. 25 Wi mua nain Mua Maneka makena-ke me naowa, wiena kema-pa opor wadola ookimik. Naeya wi Mua Maneka lotu onow marew, miiw maa unowa eena Mua Maneka sirarek nain wiena wapena-pa sirarep yiena inasina-ke naimik. Maa unowa nain Mua Maneka-ke onomakek, naapeya i anane o unuma wiar fakeram-ikowa-ke. Makena.

26 Ne aria wi naap oniwkin Mua Maneka naap onam-ikauk wia naek. Naeya wi uruw mia samora kemaiw ikok emin ururowa sira oni-ikiwem-ikemik. Feenap, wi emeria wiena mua wia piipuap wi-wieniw wiam opam-ikemik. 27 Ne wi mua pun naap, wiena emeria wameiya pokow marew, wi-wieniw wiam opowa kema manekiw ikemik. Wi emin ururow marew, mua muaiw wiam opam-ikemik. Ne pina neeke mia wiam samoram-ikemik.

28 Wi Mua Maneka amis makena nain kema me wiar wuamik. Naeya o mikikira wieya wi iiwawun momoraremik. Wi wiena kookalowa wiam ookami sira samo-samora naap me onowa nain onam-ikemik. 29 Sira feenap nain, sira samo-samora onimik, mua oko wia samorimik, maa kookalow manekiw ikaimik, ne mua oko maa wiar samorimik. Maa wiar kema kuemi wirarimik, wiam ifakimimik, riirinimik, ne wadolalimik, mua oko samor aawinok naep maa wiar iririmimik ne murarow opora wia onimik. 30 Mua oko unuma wiar samorimik, Mua Maneka iiwuarimik, mua oko opora iinan wia irimik, yo yaisow naemi unuma wiam pirimik. Wi wiena kema-pa sira samora enuma imenimik, ne wiena onak wiawi opora me wia miimimik. 31 Wi maa me pupep urufap onimik, opora wia peeskimimik, wiena teeria me wia kemalimik. Wi mua me wia kemalowa wia samo-samorimik. 32 Aria Mua Maneka-ke maek, “Wi mua sira naap onimik nain wi umep epa mukuna neeke ikiwikuan.” Wi opora nain amisaremik, nain sira samora naapiw onam-ikaimik. Me nain muutiw, wi mua papako naap onimik nain pun eliw oneka wia naimik.